لاسقى الله فراقه في نهار الربوع=يوم فرقاه موت وحلم لقياه عيد
انتظرته شهور ومال صبحه طلوع=رغم علمي بإني منتظر لي فقيد
ماحسبت المفارق قبل يرحل يروع=لين قامت جروحي وسط صدري تزيد
يوم دبّر عيونه غارقه بالدموع=وانتقل موس بعده من وريد لـ . وريد
والتفت يوم راح وقال هاك الشموع=شبها لاشعرت انك بليلك وحيد
قلت لو غبت عني يافريد الطبوع=ويش تنفع شموعٍ في غيابك تقيد
صار صدري لحزني ياعذابي قدوع=ماخذيت السعاده كون باسمي سعيد
قال عد الليالي لين يوم الرجوع=وان تأخرت تبقى ذكرياتي رصيد
قلت وقف دخيلك غيبتك إي نوع=قال مدري ولكن غصب والله شهيد
واظلم الكون توي واعترضته قنوع=مابقى شمس تشرق فـ . العمر من جديد
احسب اني قوي وفي فراقه جزوع=لين طاحت عزومي وارتجلت القصيد
اتوجـد عليه ومابقـى لـي ضلـوع=وارسم افراح عمري بـ . الجمر فـ . الجليد