زمن ما عاد يبي يفهم .. لأن الناس ما تفهم=تموت أجيال تتوارى .. مآسيها بوجه اجيال
غدى فيه العمى مبصر .. يدندن نغمة الأبكم= يشوف الناس بعيونه .. شريط ويسمعه موَّال
وموَّاله حكاية طفل .. بالتاريخ يترنم=صغير وغيَّر الدنيا .. وبدَّل حالها باحوال
كتب دمَّه ألم أمَّه .. تعيش بواقع(ن) مُبهم=توارت بين هز الخصر .. والخلخال والطبَّال
كشف عورة مساؤنا .. لمن يعلم ولا يعلم=ونعلم بس ما نعلم .. حجبنا الشمس بالغربال
وصرنا من تهاونَّا .. نخالط كيفنا بالكم=نقلِّد من يعادينا .. من الرهبة وسام أبطال
تغنِّينا بمجد(ن) زال .. كانت هيبة المسلم=تزلزل قيصر وكسرى .. لحد الصين والنيبال
وصلنا إلى بلاد السند .. ما شاف الفقر معدم=وصرنا في بحار النفط .. نتسول فتاتِ اْريال
نكَسْنا راية الاسلام .. قلنا علَّنا نسلَم=لقينا الذل فوقه ذل .. وزدنا ذلنا إذلال
نشوف المعتصم أمسى .. أجير لخادم(ن) أعجم=وحامل راية التوحيد .. صارت مهنته زبَّال
شرينا الضال والمغضوب .. عادينا بني الأرقم=وقربنا لنا الكذاب .. والنصاب والمحتال
ظُلمنا يومنا اخترنا .. نسير بدربنا المظلم=نسيناها واعتصموا .. وبدلنا الحبل بحبال
يلعنَّا الزمان اللي .. بمجده زيف نتكلم=نلوكه مثل علكة عز .. حطت في ضروس انذال
نشوف الموت يتباهى .. بدمعة طفل لم يُفطم=وُلِد في عالم(ن) ظالم .. وديد المرضعة أهوال
صغير(ن) ضعضعت ظهره .. حمول أيام ما ترحم= كأن الوقت ما حب الطفوله .. وحوَّله رجَّال
صغير(ن) ذوَّق الحكَّام .. طعم المر والعلقم=وبيَّن واقع اشيوخ(ن) .. تسِيس الدين للدجَّال
طفل دونه ملوك الأرض .. تتعرَّى وتتقزَّم=عتيَّه في فنون الغي .. وتلبس في الوغى خلخال
زمن ما عاد يبي يفهم .. لأن الناس لو تفهم =أبد ما صارت أمتنا .. رهينة بِيْد شبْهِ رجال